Shruti Haasan: தாய்மைக்கு கல்யாணம் மட்டுமே ஒரே வழியில்லை - ஸ்ருதி ஹாசன் ஓபன் டாக்!

Actress Shruti Haasan : கல்யாணம், வாழ்க்கை துணை மற்றும் தாய்மை குறித்து நடிகை ஸ்ருதி ஹாசன் வெளிப்படையாக பேசியுள்ளார். வாழ்க்கைக்கு துணை தேவைதான், ஆனால் கல்யாணம் கட்டாயமில்லை என்று கூறியுள்ளார்.

நடிகை ஸ்ருதி ஹாசன் தனது தனிப்பட்ட வாழ்க்கை குறித்து எப்போதுமே வெளிப்படையாக பேசுபவர். கல்யாணம், வாழ்க்கை துணை, தாய்மை பற்றி அவர் சமீபத்தில் பேசிய விஷயங்கள் இப்போது பேசுபொருளாக மாறியுள்ளன. பாலிவுட் நடிகை சோஹா அலி கான் நடத்தும் ‘ஆல் அபௌட் ஹர்’ பாட்காஸ்டில் ஸ்ருதி ஹாசன் கலந்து கொண்டார். அப்போது, கல்யாணம் மட்டுமே வாழ்க்கையின் ஒரே இலக்கு இல்லை என்பதை அவர் தெளிவாக கூறியுள்ளார்.

வாழ்க்கையில் நம்மை புரிந்து கொள்ளும் ஒரு துணை இருக்க வேண்டும் என்பது உண்மைதான். ஆனால், அதற்காக சமூகம் உருவாக்கியுள்ள கல்யாணம் என்ற வட்டத்துக்குள் வர வேண்டும் என்ற அவசியமில்லை என்று ஸ்ருதி கூறியுள்ளார். கடந்த காலத்தில் தானும் கல்யாணம் வரை சென்றதாகவும், ஆனால் நிறைய யோசித்த பிறகு அந்த முடிவில் இருந்து பின்வாங்கியதாகவும் அவர் வெளிப்படுத்தியுள்ளார்.

கல்யாணம் என்பது வெறும் சட்டப்பூர்வமான பேப்பர்களில் கையெழுத்து போடுவதோ அல்லது பெரிய விழா நடத்துவதோ கிடையாது. ஒருவருக்கொருவர் கொடுக்கும் மரியாதை, அன்பு, தினமும் ஒருவரை ஒருவர் புரிந்து கொண்டு சேர்ந்து பயணிப்பதுதான் உண்மையான பந்தம் என்று ஸ்ருதி கருதுகிறார்.

கல்யாணம், குழந்தை பற்றி ஓப்பனாக பேசிய ஸ்ருதி

மரபுகளை தான் மதிப்பதாக கூறியுள்ள ஸ்ருதி, கல்யாணம் என்ற பெயரில் ஆடம்பரத்துக்காக நிறைய பணம் செலவு செய்வது பற்றி தனது கருத்தை முன்வைத்துள்ளார். கல்யாணத்துக்காக வீணாக செலவு செய்யும் பெரிய தொகையை, கஷ்டப்படுபவர்களுக்கோ அல்லது சமூகத்துக்கு பயன்படும் நல்ல விஷயங்களுக்கோ கொடுத்தால் அது இன்னும் அர்த்தமுள்ளதாக இருக்கும் என்று அவர் கூறியுள்ளார்.

இதே பாட்காஸ்டில் தனது உடல்நலம் மற்றும் தாய்மை குறித்தும் ஸ்ருதி ஹாசன் வெளிப்படையாக பேசியுள்ளார். முன்பு பிசிஓஎஸ் பிரச்சனை இருந்ததால், எதிர்காலத்தில் கர்ப்பம் தரிப்பது கஷ்டமாகிவிடுமோ என்ற பயம் தனக்கு இருந்ததாக ஸ்ருதி தெரிவித்துள்ளார். இதனால் குழந்தை பற்றி நினைக்கும் போதெல்லாம் மனதில் ஒருவித பயமும் கவலையும் இருந்ததாக அவர் கூறியுள்ளார். ஆனால் சமீபத்தில் தனது மகப்பேறு மருத்துவரை சந்தித்து பேசிய பிறகு அந்த பயம் நீங்கிவிட்டதாக ஸ்ருதி தெரிவித்துள்ளார். தாயாக வேண்டும் என்ற இயல்பான ஆசை தனக்கும் இருப்பதாக அவர் தெளிவுபடுத்தியுள்ளார்.

குழந்தை பெற்றுக்கொள்ள கல்யாணம் கட்டாயமில்லை என்பது ஸ்ருதி ஹாசனின் தெளிவான கருத்து. கல்யாணம் செய்யாமலேயே தாயாகும் வாய்ப்பு அல்லது குழந்தையை தத்தெடுத்து வளர்க்கும் வாய்ப்பு என இன்றைய காலத்தில் தாய்மையை அடைய பல வழிகள் உள்ளன என்று அவர் கூறியுள்ளார். தனது வாழ்க்கையிலும் அப்படிப்பட்ட முடிவுகளை எடுக்க திறந்த மனதுடன் யோசிப்பதாக ஸ்ருதி தெரிவித்துள்ளார்.

கல்யாணம் மற்றும் தாய்மை குறித்து ஸ்ருதி ஹாசன் பேசியுள்ள இந்த நேரடியான வார்த்தைகள் இப்போது சமூக வலைத்தளங்களில் வைரலாகி வருகின்றன. தனிப்பட்ட வாழ்க்கை முடிவுகள் குறித்து அவர் கூறியுள்ள கருத்துக்கு நெட்டிசன்கள் பலவிதமாக கமெண்ட் செய்து வருகின்றனர்.